Sipas të dhënave zyrtare¹, në sistemin e arsimit të lartë në Shqipëri janë të regjistruar gjithsej 122,613 studentë. Nga këta, 70.9% ndjekin studimet në universitetet publike, ndërsa 29.1% frekuentojnë institucionet private. Të dhënat e INSTAT² për vitin akademik 2024–2025 tregojnë gjithashtu se 59% e studentëve të universiteteve publike studiojnë në Tiranë.
Megjithatë, studentët shqiptarë përballen sot me një barrë financiare gjithnjë e më të rënduar. Përveç kostove të akomodimit, ata duhet të përballojnë edhe shpenzimet e përditshme të jetesës, të cilat janë rritur ndjeshëm vitet e fundit. Vetëm gjatë pesë viteve të fundit, niveli i përgjithshëm i çmimeve³ është rritur me 17.4%, duke ndikuar drejtpërdrejt në buxhetin e studentëve dhe duke e vështirësuar mbulimin e nevojave bazë. Ky trend reflektohet në rritjen e qirave, kostos së ushqimit, transportit dhe shërbimeve të tjera esenciale, duke e shndërruar jetën studentore në një sfidë të përhershme për shumë të rinj dhe familjet e tyre.
